तिमी कुनै मेलामा हराएकी पनि होइनौं
भेटेर छुटिएकी पनि होइनौं
तर कतै भेटे जस्तै
कतै छुटे जस्तो छ तिम्रो खोजि।
तिमी
मेरो मन पर्ने फुल
गोदावरी झैँ उज्यालो छौ जस्तो लाग्छ
तिमी मेरी आमा जस्तो
कारुणिक छौ जस्तो लाग्छ
तिम्रो साथ
पुषको घाम झैँ न्यानो छ जस्तो लाग्छ
तिमीले यो मनलाई
रातमा जुनले झैँ वाटो देखाउछौ जस्तो लाग्छ
तिमी मेरो मनमा सजिएर बसेकी छौ जस्तो लाग्छ
त्यसैले कल्पनामा पनि हरबार एकै तस्बिर भेटिन्छ
कुनै हसमुख आकृतिको।
तिमी कहाँ सम्म थियौ
तिमी कहाँबाट छुट्टियौ
किन यस्तो लाग्छ कि
रुक्मणीले श्रीकृष्ण बोलाए जस्तो
तिमीले मलाई बोलाइरहेकी छौ।
कुनै दुरको ठाउँमा
सुमधुर आवाजमा सुसेलिने भाकामा मेरो नाम मिसिएको छ
त्यो सुमधुर ठाउँले
कहिले होला मलाई बताउने उसको ठेगाना।
हराउनु
बोलाउनु
भेटिनु
रमाउनु
रङ्गिनु
बस् यति मै यो काया जाला जस्तो छ
अगाडि बढ्न तिम्रो साथ चाहिन्छ
तिमी छैन पुग्ने गन्तव्य नै छैन।
